Ang Huling El Bimbo – Eraserheads

Ang Huling El Bimbo - Eraserheads

ANG HULING EL BIMBO

E. Buendia

Kamukha mo si Paraluman nung tayo ay bata pa
At ang galing-galing mong sumayaw mapa-Boogie man o Chacha
Ngunit ang paborito ay pagsayaw mo ng El Bimbo
Nakakaindak, nakakaaliw, nakakatindig balahibo

Pagkagaling sa ‘skwela ay didiretso na sa inyo
At buong maghapon ay tinuturuan mo ako

CHORUS
Magkahawak ang ating kamay at walang kamalay-malay
Na tinuruan mo ang puso ko na umibig na tunay

Naninigas aking katawan ‘pag umikot na ang plaka
Patay sa kembot ng bewang mo at pungay ng ‘yong mga mata
Lumiliwanag ang buhay habang tayo’y magkaakbay
At dahan-dahang dumudulas ang kamay ko sa makinis mong braso, hooh

Sana noon pa man ay sinabi na sa iyo, hoh
Kahit hindi na uso ay ito lang ang alam ko

(CHORUS)

La la la la, la la, la la, la la la

Lumipas ang maraming taon, ‘di na tayo nagkita
Balita ko’y may anak ka na ngunit walang asawa

Tagahugas ka raw ng pinggan sa may Ermita
At isang gabi’y nasagasaan sa isang madilim na eskinita, hah

Lahat ng pangarap ko’y bigla lang natunaw
Sa panaginip na lang pala kita maisasayaw

(CHORUS 2x)

CODA
La la la la, la la, la la, la la la [2x]

Formalismo
 
Sa akdang Huling El Bimbo, makikita rito ang pangyayari sa buhay ng isang babaeng magaling sumayaw. Masasabi na magaling sumayaw ang babaeng ito sapagkat nakatawag pansin ang kanyang pagsasayaw sa kaibigan niyang lalaki. Nang sila’y nag-aaral na, madalas dumadalaw ang lalaki sa pamamahay ng babae upang magpaturo sumayaw ng el bimbo, isang sayaw na nagpakilala sa kagalingan ng babae. Di lumaon ay tumanda na ang dalawa. Nagkahiwalay sila ng landas, ngunit matagal na silang di nagkikita. Nabalitaan na lang ng lalaki na naanakan ang kababatang babae at naging tagahugas ng pinggan sa may ermita. At isang gabi, nasagasaan ang babae sa isang madilim na eskinita. Bago ang huling pag-awit ng koro, sinabi niya na natunaw na ang kanyang mga pangarap at na panaginip na lang raw niya maisasayaw ang babae. Sa pagtatapos ng kanta, inulit muli ang koro, pagkatapos ng huling berso.
 
Feminismo
 
Ang akdang Ang Huling el bimbo ay tungkol sa kwento ng kasintahan ng isang lalaki. Noong sila’y mga bata pa lamang, tinuturuan ng babae ang lalaki sa pag sayaw ng el bimbo. Sa ikatlong saknong ng kanta, makikita na nabubuo ang relasyon ng dalawa dahil sa madalas na pag dalaw ng lalaki at ang pagpapaturo nitong sumayaw. Sa akdang ito, pinapakita na magaling sumayaw ang mga babae. Sa ikalawa at ikalimang na saknong, manghang-mangha ang lalaki sa pagsayaw ng kanyang kasintahan. Pinapakita rito na ang mga babae ay tinitingalaan ng kanilang mga nobyo dahil sa kanilang kagalingan. Sa buong kanta, makikita sa mga salita na kahit nagkamali ang babae , nais pa rin ng lalaki na Makita siya nito. Sa aking palagay, hindi naisulong ang femenismo sa akda. Kahit na tinitingala ang babae rito ,wala akong nakitang pagtubo o pagkilos na nagpa-angat sa imahen ng babae sa kanta.
 
 
Sinuri ni Kim Viloria, E2012

“Superman ang Misis Ko” ni Abdon M. Balde Jr.

Superman ang Misis Ko ni Abdon M. Balde Jr.

Superman ang Misis ko

ni Abdon M. Balde Jr.

Una ko siyang makadaupang palad, ramdam ko na agad ang tigas ng kanyang mga daliri. Sabi’y pinaglalaba’t pinagsisibak ng panggatong ng magulang. Tibo ka ba? tanong ko minsan. Ang sagot ay kunwaring suntok sa dibdib ko.

            Pero napakaganda niya para pakawalan. At napakabait. Siya’ng omoorder at nagdadala ng pagkain sa mesa. Inaalalayan niya ‘ko sa pagtawid sa kalsada.

            Nang ikasal kami’y kinarga niya ‘ko paakyat sa apartment, habang yakap ko ang saklay sa paa. Pangatlong palapag kami. Kanya ang mabibigat na gawain: pagkabit ng TV antenna, pagkumpone ng kisame, pagpalit ng screen. Ako’y taga-luto lang.

           Isang hatinggabi nagkasunog sa unang palapag. Abot sa ikaapat na palapag ang usok. Sensitibo ako sa usok, agad akong nahilo. Nang balikan ng malay, nasa ospital na ‘ko. Nasunog ang buong apartment. Kaunti kaming nakaligtas.

            Sa bagong apartment, bago matulog, tinanong ko kung paano n’ya ‘ko nailigtas. Inilipad kita palabas ng sunod na apartment, sagot n’ya.

Formalismo

Ang akda ay tungkol sa isang lalaking kinukwento at inilalarawan ang kanyang asawa. Kanyang sinabi ang pagiging malakas at iba ng kanyang asawa. Masasabing ang lalaki ay may problema sa kalusugan dahil una, gumagamit sya ng saklay (…kinarga niya ‘ko paakyat sa apartment, habang yakap ko ang saklay sa paa…) at pangalawa, ang kanyang pagiging sensitibo sa usok. Mahihinuhang dahil sa mga kahinaang ito ay nailarawang mas malakas ang babae at ang ito ang siyang gumagawa ng mga gawaing panlalaki.
Ang karurukan ng kwento ay ang pagkakaroon ng sunog sa tahanan ng mag asawa. Ipinakita rito ang pagsagip ng babae sa kanyang mister kahit sila ay nasa ikaapat na palapag ng gusali. Sa huli, nagtapos ito sa pagtanong ng lalaki sa kanyang asawa kung paano siya iniligtas nito. Sumagot ang babae at sinabing inilipad siya nito.
Ipinakita sa akdang ito na kahit may mga kakulangan ang lalaki, mayroon paring nagmamahal sa kanya na handang solusyunan ang kanyang mga pagkukulang.

Feminismo

Ang akda ay tungkol sa isang lalaking inilalawarawan ang kanyang asawa. Sa kanyang pagkuwento, ipinakita ang ibat’ ibang katangian ng kanyang misis na taliwas sa normal na paglalarawan sa mga kababaihan.

Sa akdang ito, inilarawan ang babae bilang malakas at tila asal lalaki. Sinabi rin na ang babae ay ginagawa ang mga gawaing lalaki lamang ang madalas na gumagawa. Halimbawa ng mga ito ay ang pagkabit ng mga kagamitan at pagkumpuni ng kisame.

Inilalarawan pa rin ang relasyon ng babae at lalaki bilang mag-asawa ngunit sa akdang ito, naging magkaiba ang mga gawaing kanilang ginagawa. Sa akdang ito, ipinakita na ang lalaki ang nagluluto, isang gawaing pambahay na kadalasang babae ang gumagawa.at ang babae naman ang siyang gumagwa ng mga kilos panglalaki katulad ng pagbuhat sa asawa, pagaayos ng kisame at iba pa.

Masasabing naisulong ng akdang ito ang feminism dahil naipakita nito na ang mga babae ay may kakayahang gawin ang mga gawaing madalas na sa lalaki lamang naitatakda. Ipinakita ito sa pagsabi na iniligtas ng Misis ang kanyang Mister sa sunog, isang simbolo na nagpapakita sa taliwas na paniniwalang ang lalaki, ang dapat sumagip sa kababaihan. Dahil dito, naipakita na ang mga kababaihan ay hindi mahina at may kakayahang makipagsabayan sa mga kalalakihan.

Sinuri ni Kyle Camarillo, E2012